Toshkent davlat agrar universiteti hududidagi yong‘in O‘rmon xo‘jaligi agentligi binosidan chiqqani haqidagi xabarlarga rasmiy munosabat bildirildi.
“Oʻrmon xoʻjaligi agentligi binosi yonib ketdi, deya ayrim ijtimoiy tarmoqlarda berilayotgan xabarlar haqiqatga toʻgʻri kelmaydi. Toʻgʻri, suv purkalishi evaziga binoning tom qismiga qisman zarar yetgan, lekin bu ham aytarli darajada emas”. Bu haqda OʻzAga Oʻrmon xoʻjaligi agentligi matbuot xizmati xabar bergan.
Maʼlum qilinishicha, agentlik binosi katta talofat koʻrmagan. Yongʻin chiqqan universitet binolariga esa birmuncha ziyon yetkazilgan. Ayni paytda mutaxassislar guruhi voqea joyida ish olib bormoqda. Tez orada yongʻin kelib chiqish sabablari, yongʻin asli qayerdan boshlangani, yetkazilgan ziyon, asl holat haqida batafsil maʼlumot beriladi.
Avval xabar berilganidek, kecha, 30-sentyabr kuni soat 20:10 da Toshkent viloyati, Qibray tumanida joylashgan Toshkent davlat agrar universiteti hududidagi binoda yongʻin sodir boʻlgan. Yongʻin-qutqaruv ekipajlari tomonidan soat 21:36 da qurshab olingan va soat 22:10 da batamom oʻchirilgan.
