"Milliy tiklanish" partiyasining ta’kidlashicha, pedagoglar maqomini mustahkamlash, qadr-qimmatini himoya qilish, ularga nisbatan g‘amxo‘rlik ko‘rsatish jamiyat taraqqiyoti uchun juda muhim. Shu bois, partiya Ta’lim kodeksini ishlab chiqishga ham dolzarb masala sifatida qaramoqda. Ushbu kodeks ta’lim tizimidagi xodimlarning huquqiy kafolatlari, majburiyat va imtiyozlarini aniq belgilab beradi. Uning qabul qilinishi ta’lim tizimini yanada rivojlantirish, jamiyatning barcha jabhalarida ijobiy o‘zgarishlarga turtki beradi.
Qo‘shimcha qilinishicha, partiya jamiyat ravnaqiga xizmat qiladigan sifatli ta’lim tizimi va tarbiyani ustuvor vazifa qilib belgilagani holda barkamol avlodni shakllantirish g‘oyasini ilgari surishda davom etadi. Bu yo‘nalishda Ta’lim kodeksini qabul qilishni o‘ta muhim vazifa, deb biladi. Chunki ushbu kodeks jamiyat ravnaqi va farzandlarimizning ta’lim-tarbiyasi uchun zarur huquqiy asos bo‘lib xizmat qiladi. Kodeks o‘z nomi bilan huquqiy kafolatlar, burch va majburiyatlarni aniq belgilab beradi.
Shuningdek, pedagoglar uchun imtiyoz va g‘amxo‘rliklar hamda ularning jamiyatdagi o‘rnini mustahkamlashga qaratilgan chora-tadbirlarni ham o‘z ichiga oladi. Binobarin, Ta’lim kodeksi nainki ta’lim tizimi, balki jamiyatning barcha sohalari taraqqiyotiga ham o‘zining ijobiy ta’sirini ko‘rsatadi.