Islom Ismoilov: Biz O‘zbekiston futboli uchun tarix yozmoqchimiz

O‘zbekistonning U-17 yoshlar terma jamoasi Osiyo chempioni sifatida jahon chempionatiga yo‘l olmoqda. Jamoa bosh murabbiyi Islombek Ismoilov fikricha, ular jahon sahnasida ham munosib ishtirok etishga tayyor.

FIFA U-17 jahon chempionati joriy yilning 3–27-noyabr kunlari Qatarda bo‘lib o‘tadi. O‘zbekiston jamoasi musobaqaga Osiyo chempioni sifatida yetib kelmoqda.

Ikki yil avval O‘zbekistonning 17 yoshlilar terma jamoasi Indoneziyada o‘tgan musobaqada chorak finalgacha yetib borib, butun dunyo e’tiborini qozongan edi. O‘shanda jamoa pley-off bosqichida Angliyani mag‘lub etgan, keyinchalik musobaqa finaliga chiqqan Fransiyaga minimal hisobda yutqazgandi.

Bu yilgi chempionat oldidan ham katta umidlar bog‘lanmoqda. O‘zbekiston jamoasi shu yil aprel oyida Saudiya Arabistonini 2:0 hisobida mag‘lub etib, Osiyo chempioni bo‘ldi.

O‘zbekiston U-17 terma jamoasi jahon chempionatidagi ilk o‘yinini 5-noyabr kuni Paragvayga qarshi o‘tkazadi. Shuningdek, jamoa Irlandiya Respublikasi va Panama bilan ham J guruhida bahs olib boradi.

Musobaqa oldidan bosh murabbiy Islombek Ismoilov Qatardagi maqsadlar, jamoa tayyorgarligi va yosh futbolchilar uchun bu musobaqaning ahamiyati haqida so‘zlab berdi.

— O‘zbekiston jahon chempionatiga Osiyo chempioni sifatida yo‘l olmoqda. Bu g‘alaba jamoangizga qay darajada ishonch berdi va Qatardagi asosiy maqsadingiz nima?

— U-17 Osiyo chempionligini qo‘lga kiritish — biz uchun katta sharaf. Biroq bu bilan birga mas’uliyat ham ortdi. Bu g‘alaba futbolchilarimizga katta ishonch bag‘ishladi, biz esa tayyorgarlikni yanada kuchaytirdik. Jahon chempionatidagi asosiy maqsadimiz — O‘zbekiston futboli tarixida yangi sahifa ochish, jamoaviy o‘yin, intizom va iroda orqali salohiyatimizni namoyon etish.

— O‘zbekiston 2023-yilda chorak finalgacha yetgandi. O‘sha tajribadan nimalar o‘rgandingiz?

— O‘tgan safar jamoani boshqargan murabbiy Jamoliddin Rahmatullayev bilan ko‘p suhbatlar o‘tkazdim. Ular qilgan xatolar va qay jihatlarga ko‘proq e’tibor berganini o‘rgandim. Biz xulosani faqat o‘sha musobaqadan emas, har bir o‘yindan chiqardik. Asosiy saboq — bosim ostida to‘g‘ri qaror qabul qilish va o‘yin nazoratini saqlash edi. Shu jihatlarga tayyorgarlik jarayonida alohida e’tibor berdik. Har bir futbolchi nafaqat texnik, balki ruhiy jihatdan ham tayyorlandi. Endilikda biz kuch bilan birga aql bilan ham o‘ynaydigan jamoamiz.

— Osiyo musobaqalari bilan jahon chempionati o‘rtasida taktik jihatdan qanday farq bor?

— Asosiy farq — o‘yin sur’ati va qaror qabul qilish tezligida. Yevropalik, afrikalik yoki janubiy amerikalik jamoalarga qarshi o‘ynaganda, harakat va fikr uchun vaqt juda oz bo‘ladi — raqiblar bosimni ancha yuqori sur’atda amalga oshiradi.

Shuning uchun mashg‘ulotlarda tez qaror qabul qilish va maydonni his etish qobiliyatini oshirishga alohida e’tibor berdik. Shu bilan birga, o‘yin uslubimizni yanada dinamik va faol qildik — hujumda agressiv pressingga urg‘u bermoqdamiz.

— Jahon chempionati oldidan tayyorgarlik qanday kechmoqda?

— O‘zbekiston futbol assotsiatsiyasi tayyorgarlik jarayonini juda yaxshi tashkil qildi. Bir nechta xalqaro o‘rtoqlik uchrashuvlarida turli taktik yondashuvlarni sinab ko‘rdik. Guruhdagi raqiblar — Paragvay, Irlandiya va Panama jamoalarini chuqur tahlil qildik, ularning kuchli va zaif jihatlarini o‘rgandik. Shu asosda har bir raqib uchun alohida o‘yin modeli ishlab chiqdik. Endi biz bir uslubga bog‘lanib qolmagan, raqibga moslasha oladigan va o‘z o‘yinini o‘tkaza biladigan jamoamiz.

— Yosh futbolchilar uchun bu musobaqa katta sinov. Ularning ruhiy va jismoniy tayyorgarligi qay darajada?

— Bu yoshdagi futbolchilar katta musobaqalarda bosimni kuchli his qiladi. Shuning uchun biz ularga bosimga dosh berishni o‘rgatmoqdamiz. Jismoniy tayyorgarlik bilan birga har kuni psixologik mashg‘ulotlar va jamoaviy suhbatlar o‘tkazamiz. Bu ularga o‘yin paytida salohiyatini to‘liq namoyon etishga yordam beradi. Shuningdek, tezlik va barqaror tempni saqlab turish uchun maxsus jismoniy dastur ishlab chiqilgan.

— Nihoyat, O‘zbekiston muxlislariga va yosh futbolchilarga nima degingiz keladi?

— Sizning ishonchingiz bilan biz Osiyo chempioni bo‘ldik, endi duolaringiz bilan jahon chempionatiga ketyapmiz. Ruhan va ma’nan bizga tayanch bo‘ling, ishonchingizni yo‘qotmang. Barcha yosh futbolchilarga aytaman: imkoniyat berilsa, uni qadrlang va mehnat bilan asrang. Chunki iqtidor yo‘lni ochadi, ammo mehnat sizni maqsadga yetkazadi. Biz jahon chempionatiga faqat g‘alaba uchun emas, balki O‘zbekiston nomini sharaf bilan himoya qilish uchun ketyapmiz.