Aholisi atigi 1,5 ming bo‘lgan qishloq jamoasi Shvetsiya chempioni bo‘ldi

27-tur doirasida “Myellybyu” safarda “Gyoteborg”ni 2:0 hisobida mag‘lub etib, o‘z ochkolari sonini 66 taga yetkazib qo‘ydi. Hozirda jadvalning ikkinchi pog‘onasidan joy olgan Stokgolmning “Hammarbyu” klubi yetakchidan 11 ochkoga ortda qolmoqda. Hatto qolgan uchta o‘yinda mag‘lub bo‘lsa-da, “Myellybyu” 1-o‘rindan tushib ketmaydi. E’tiborli tomoni shundaki, ushbu jamoa mavsum davomida atigi bir marta mag‘lubiyatga uchragan.

“Xallevik mo‘’jizasi” deb atalayotgan klub Shvetsiya oliy divizionidagi eng kichik byudjetlardan biriga ega. “Malmyo” Shvetsiyadagi eng boy klubi sanaladi, “Myellybyu” esa ularning byudjetining atigi 15 foiziga ega. Shu sabab ko‘pchilik mavsum boshlanishidan oldin “Malmyo” ketma-ket uchinchi marta chempion bo‘ladi, deb o‘ylagan. Biroq “Myellybyu” chempionatni ajoyib boshladi va avgust oyida “Malmyo”ni mag‘lub etganidan so‘ng, bu jamoa haqiqatan ham chempionlik uchun kurasha olishi mumkinligini isbotlagan. Jamoaning uy stadioni 6 750 tomoshabinni sig‘dira oladi.

1939-yilda tashkil topgan klub uchun bu tarixdagi eng katta yutuq hisoblanadi. Bungacha “Myellybyu”ning Shvetsiya chempionatidagi eng yaxshi natijasi beshinchi o‘rin edi (2024). 2023-yilda esa jamoa mamlakat kubogi finaliga chiqib, “Hekken”ga 1:4 hisobida mag‘lub bo‘lgan.

“Myellybyu”ni 59 yoshli murabbiy Anders Torstensson boshqaradi. U 2023-yildan beri jamoa bosh murabbiyi bo‘lib, o‘sha yili unga surunkali limfoleykoz (qon kasalligi) tashxisi qo‘yilgan edi. Ammo kasallik bilan kurashayotgan bo‘lsa-da, jamoani chempion qilishni uddaladi.

“Bu holatni so‘z bilan ifodalash qiyin. Bu nihoyatda kuchli hissiyot. Biz jamoa bilan birgalikda bosimni, mish-mishlarni, ‘mumkin’ yoki ‘mumkin emas’ degan gaplarga nuqta qo‘ygan holda chempionlikni qo‘lga kiritdik. Bu ajoyib natija”, dedi “Myellybyu” bosh murabbiyi Anders Torstensson. 

Keyingi yil “Myellybyu”ni yanada mas’uliyatli sinov kutmoqda. Jamoa kelasi mavsum Chempionlar Ligasi saralash bosqichidan o‘ta olsa, Yevropaning eng nufuzli klublariga qarshi maydonga tushadi. Atigi 1,5 ming aholisi bor baliqchilar qishlog‘iga “Real Madrid” yoki “Liverpul” kabi jamoalar kelishi mumkin.