2025. 28-Oktabr. Seshanba
21-08-2025 06:32
Uning ijtimoiy tarmoqdagi rasmiy sahifalarida yozilishicha, Kaprio oshqozonosti bezi saratoniga qarshi uzoq va mardona kurashdan so‘ng vafot etgan. Bu mazmundagi postlar internetda 20-avgust kuni e’lon qilingan. U o‘tgan hafta Facebook’da qisqa video joylab, o‘zini biroz yomon his qilayotganini va yana shifoxonaga yotqizilganini bildirib, odamlardan uning haqqiga duo qilishini so‘ragan edi.
Kaprio sud zalini “mehr va rahm-shafqat hukmron bo‘lgan joy” sifatida ta’riflar edi. U ko‘pincha jarimalardan kechib yuborib, sudlanayotganlarga yaxshilik qilardi. Xususan, u bir safar o‘g‘lidan ayrilgan ayolning 400 dollarlik jarimasini bekor qilgan, boshqa bir vaziyatda esa soatiga atiga 3,84 dollar maosh oladigan barmenning qizil chiroqda o‘tib ketgani uchun solingan jarimasidan kechib yuborgan edi. O‘sha paytda Kaprio sud zalidagilarga murojaat qilib, shunday degan:
“Ovqatlanib bo‘lib, pulini to‘lamay chiqib ketmang. Chunki bunday qilgan odamning hisobini kun bo‘yi 3 dollarga ishlab yurgan bir bechora to‘laydi”.
Kaprio o‘z chiqishlarida adolat tizimidagi tengsizliklarga ham e’tibor qaratgan:
“Barchaga ozodlik va adolat” degan ibora adolatning hamma uchun teng bo‘lishini va birdek amal qilishini anglatadi. Ammo haqiqatda bunday emas. Kam ta’minlangan amerikaliklarning qariyb 90 foizi sog‘liqni saqlash, uyidan ko‘chirib yuborish, faxriylar nafaqasi va hatto yo‘l qoidabuzarliklari kabi muammolarni yolg‘iz o‘zi hal qilishga majbur.
Ma’lumot uchun, Frenk Kaprio dastlab AQSHning Rod Aylend kollejida tahsil olgan. Talabalik davrida u o‘qishini davom ettirish uchun ishlashga majbur bo‘lgan. Keyinchalik Kaprio Suffolk universitettining huquq fakultetida yuridik ta’lim olgan va advokatlik darajasini qo‘lga kiritgan. Dastlab Frenk maktabda o‘qituvchi bo‘lib ishlagan, shu bilan birga yuridik faoliyatini ham boshlagan. U 1985-yilda Providence Municipal Court sudyasi etib tayinlangan va qariyb 40 yil shu lavozimda xizmat qilgan.
Sudyaning oilasi uni “mehribon er, ota, bobo va do‘st” sifatida ta’riflaydi:
“U insonparvarligi, kamtarligi va odamlarning yaxshiligiga bo‘lgan ishonchi bilan millionlab odamlarning qalbidan joy olgandi”.
Rod Aylend gubernatori Den Maki esa uni shunday yodga oldi:
“Sudya Kaprio nafaqat xalq uchun xizmat qildi, balki odamlar bilan samimiy aloqada bo‘ldi. U sud zalida mehribonlik bilan adolatni uyg‘unlashtirib, bizga adolat insonparvarliksiz bo‘lishi mumkin emasligini isbotladi”.
Ma’lumot o‘rnida, Kaprio 2023-yilda Providence shahar sudidan nafaqaga chiqqan. U oddiy oiladan chiqqan bo‘lsa-da, butun umrini adolatni fuqarolarga adolatli tarzda qo‘llash bilan o‘tkazdi.
