Ism qo‘yish va ularning yozilishini milliy an’analarga muvofiqlashtirish taklif etilmoqda
23.09.2024 09:11
"Milliy tiklanish" demokratik partiyasi bugungi kunda dolzarb masalalardan biri bo‘lgan bolalarga ism qo‘yish va ularni imloviy xatolarsiz yozish bo‘yicha o‘z takliflarini kiritdi.
Partiya o‘z saylovoldi dasturida "Ism qo‘yish va ularning yozilishini milliy an’analarga muvofiqlashtirish" taklifini ilgari surmoqda. Partiya mazkur taklifni yangi avlod tarbiyasida milliy madaniy meros va qadriyatlarga ustuvor ahamiyat berish bilan izohlamoqda. Shuningdek, partiya o‘z taklifini izohlar ekan, televideniye va internet tarmoqlarida namoyish etilayotgan xorij filmlarida gavdalantirilgan bosh qahramonlarning ismlari farzandlarga qo‘yilishini ham qoralagan.
Bundan tashqari, "Milliy tiklanish" demokratik partiyasi, ismlarni qayd etishda yo‘l qo‘yilayotgan imloviy xatolar jamiyatning savodxonlik darajasiga ham salbiy ta’sir ko‘rsatishini ta’kidlagan.
"Xususan, x va h, o‘ va u, q va k harflarining noto‘g‘ri qo‘llanilishi nafaqat tildagi aniqlikni buzadi, balki kelajakda ham turli ma’muriy va huquqiy muammolarga olib kelishi mumkin. Bu muammolarni bartaraf etish uchun davlat tomonidan hujjat tayyorlash tizimini qayta ko‘rib chiqish, savodli mutaxassislarni jalb etish va ota-onalar o‘rtasida ma’rifiy ishlarni olib borish zarur", — deya qo‘shimcha qiladi partiya.