Yozda tonirovkaga arzonlashtirilgan narx joriy etilishi mumkin

Loyihaga ko‘ra, “M1 toifaga oid avtotransport vositalarining orqa va old yon oynalarining tusini o‘zgartirish (qoraytirish) uchun har yili 1-maydan – 31-avgustgacha beriladigan ruxsatnoma bo‘yicha:

• Jismoniy va yuridik shaxslar uchun — BHMning 1 baravari miqdorida (412 ming so‘m);
• O‘zbekistonda faoliyat ko‘rsatayotgan xorijiy davlatlar yuridik shaxslari uchun — BHMning 5 baravari (hozirda 2 060 000 so‘m) miqdorida tashkil etishi ko‘zda tutilmoqda.

Bunda, qisqa muddatli ruxsatnoma uchun to‘lov ruxsatnoma rasmiylashtirilgan sanadan qat’i nazar, to‘liq hajmda amalga oshiriladi.

Shuningdek, orqa va old yon oynalarining tusini o‘zgartirish (qoraytirish) uchun 1-yil muddatga beriladigan uzoq muddatli ruxsatnoma bo‘yicha:

• jismoniy va yuridik shaxslar uchun — bazaviy hisoblash miqdorining sakkiz baravari (3 mln 296 ming so‘m) miqdorini;
• O‘zbekiston Respublikasida faoliyat ko‘rsatayotgan xorijiy davlatlar yuridik shaxslari uchun — bazaviy hisoblash miqdorining o‘n to‘rt baravari miqdorini tashkil etishi belgilanmoqda.