Ayrim hududlarda avtomobil harakat tezligi me’yori 130 kilometr/soatgacha oshirilishi mumkin

Qayd etilishicha, shu yilning 9-iyul kuni O‘zbekiston Respublikasi Prezidenti raisligida o‘tkazilgan Yo‘l harakati xavfsizligini ta’minlash, infratuzilmasini yaxshilash va tirbandliklarni kamaytirish chora-tadbirlari muhokamasi yuzasidan videoselektor yig‘ilishida berilgan topshiriqlar ijrosini ta’minlash bo‘yicha respublika va viloyatdan tashkil etilgan ishchi guruh vakillari o‘z faoliyatini boshladi.

Jumladan, Surxondaryo viloyatidagi xalqaro ahamiyatga molik M-39 Olmaota–Bishkek–Toshkent–Shahrisabz–Termiz avtomobil yo‘lining Termiz–Boysun yo‘nalishida harakatlanadigan avtotransport vositalarining harakatlanish tezligini soatiga 130 kilometr qilib belgilash bo‘yicha ko‘rikdan o‘tkazdi.

Unda:

• M-39 avtomobil yo‘lining 1315–1324-kilometri, Qashqadaryo viloyatidan Surxondaryo viloyatiga kirishning Oqrabod aholi yashash hududi oralig‘ida tezlik soatiga 90 kilometr,
• 1324–1326-kilometr oralig‘ida, Shifobuloq mahallasi hududida soatiga 70 kilometr,
• 1337–1349-kilometr oralig‘ida soatiga 100 kilometr,
• Sherobod tumani hududidagi 1374–1400-kilometr oralig‘ida esa soatiga 130 kilometr qilib belgilash ko‘zda tutilmoqda.

Shuningdek:

• M-39 avtomobil yo‘lining 1321—1391 km oralig‘ida xavfli burulishga jami uzunligi 7 kilometr bo‘lgan birinchi guruh yo‘l to‘siqlarini o‘rnatish;
• ushbu avtomobil yo‘lida o‘rnatilgan belgilarining yaroqsiz holga kelib qolgan 475 tasini yangisiga almashtirish,
• 20 ta xavfli burilishlarga jami 1800ta 1.31.1, 1.31.2 yo‘l belgilarini o‘rnatish,
• 1315-kilometridan 1400 kilometrgacha yo‘l yotiq chiziqlarini yangilash.

Mazkur yo‘nalishdagi mavjud oltita ko‘priklarning qoplama qismini to‘lqinsimon do‘ngliklarni ta’mirlash ishlarini amalga oshirish zarurligi aniqlandi.

Mutasaddilar tomonidan mavjud kamchiliklarni bartaraf etish masalasi ko‘rib chiqiladi.

O‘rganish ishlari amalga oshirilib, mutaxassislar tomonidan kamchiliklar bartaraf etilishi va shundan so‘ng qayta ko‘rikdan o‘tkazilib, ko‘rsatilgan kilometrlar oralig‘ida tavsiya etilgan tezlik joriy etilishining maqsadga muvofiqligi ma’qullangan.