Buxoro viloyatida 37 yoshli erkak xotiniga bolta bilan og‘ir jarohat yetkazdi. Bu haqda Oliy sud matbuot kotibi Aziz Obidov ma’lum qildi.
Bildirilishicha, joriy yilning 16-aprel kuni soat 20:00 larda 1987-yil G‘ijduvon tumani Oqrabot qishlog‘ida tug‘ilgan G‘.A. (ismi o‘zgartirildi) uyida turmush o‘rtog‘i bilan tortishib qolgan va metall dastali boltaning tig‘ qismi bilan uning bosh va orqa bel sohasiga qasddan urib, og‘ir shikast yetkazgan.
Mazkur ish yuzasidan ko‘rilgan sudda G‘.A.ga nisbatan Jinoyat kodeksining 126-1-modda (oilaviy (maishiy) zo‘ravonlik) 7-qismi «j» bandi bilan 7 yil muddatga ozodlikdan mahrum qilish jazosi tayinlangan.
Biroq, sud jabrlanuvchining da’vosi yo‘qligini, G‘.A. qilmishiga pushaymonligini, jabrlanuvchi bilan yarashib, voyaga yetmagan to‘rt nafar farzandlarni tarbiyalab kelayotganligini, oilada yagona boquvchiligini, qolaversa, uning qaramog‘ida qariya kasalmand onasi borligini, G‘ijduvon tumani Oqrabot mahalla fuqarolar yig‘inining kafolat xatini e’tiborga olgan holda Jinoyat kodeksining 72-moddasini (shartli hukm qilish) qo‘llab, shartli hukm qilinib, 2 yil sinov muddati belgilangan.
