Qashqadaryoda KamAZ «pritsep»i chiqib ketib, 3 ta mashinaga urildi
16.09.2024 20:49
Qashqadaryo tumanida KamAZ'ning tirkamasi harakat vaqtida chiqib ketib, 3 ta mashina bilan to‘qnashdi. BU haqida viloyat YHXB xabar berdi.
Ma’lum qilinishicha, 2024 yil 15 sentyabr kuni soat 13:20 larda Dehqonobod tumani Dehqonobod MFY hududidan o‘tgan M-39 Toshkent-Termiz avtomobil yo‘lining 83 kilometrida haydovchi X.X. boshqaruvida bo‘lgan KamAZ yuk avtomashinasining orqa tirkamasi chiqib ketgan.
Oqibatda tirkama harakat yo‘nalishi bo‘yicha oldinda qarama-qarshi tomondan harakatlanib kelayotgan haydovchi A.Sh. boshqaruvida bo‘lgan boshqa KamAZ yuk avtomashinasini chap yon tomoniga, shuningdek, «Labo» avtomashinasining old tomoniga borib urilgan. Tirkama bundan tashqari yo‘l chetida turgan «Cobalt»ning orqa tomoniga borib urilgan.
Hodisa sabab «Labo» haydovchisi tan jarohati olib tuman shifoxonasiga yotqizilgan. Holat yuzasidan surishtiruv harakatlari boshlangan.
