"Bog‘ va sayilgohlar faqat xalqniki bo‘lishi kerak" — “Adolat” SDP
11.09.2024 11:09
So‘nggi yillarda davlat mulki hisoblangan umumiy foydalanishdagi bog‘lar, sayilgoh, xiyobon va daraxtzorlar hududida bino-inshootlarni qurish amaliyoti kengayib borayotganligi ko‘p yillik daraxtlarning kesilishiga, atrof muhitni ifloslanishiga, oqibatda aholining haqli noroziligiga sabab bo‘lmoqda.
Partiya o‘rganishlariga ko‘ra, hozirgi kunda respublikadagi 184 ta istirohat bog‘larida daraxtzor hududlar kamaytirilib, 944 ta bino-inshoot qurilgan. 18 ta istirohat bog‘ida 91 ta noqonuniy qurilma mavjud ekanligi aniqlangan. Ularning 98 tasida 1 248 ta attraksionlar noqonuniy o‘rnatilgan.
Shu bilan birga, qonunchilikdagi bo‘shliqlar sabab, mahalliy hokimliklar tomonidan istirohat bog‘larining yerlarini mahalliy hokimiyat zaxirasiga olish va keyinchalik xususiylashtirish yoki begonalashtirish amaliyoti kengayib bormoqda. Natijada, yangidan qayta-qayta kadastr hujjatini tuzish orqali bog‘lar hududi qisqarib ketmoqda.
“Adolat” SDP o‘zining 2025-2029 yillarga mo‘ljallangan yangi Saylovoldi dasturida ijtimoiy obyektlarni saqlab qolish maqsadida istirohat bog‘lari, bolalar oromgohlari, sayilgohlar, ta’lim va tibbiyotga oid davlat obyektlari va ularning hududlarini sotish, xususiylashtirish yoki begonalashtirishni taqiqlash, bunday harakatlar uchun javobgarlik belgilashni taklif qilmoqda.