Suyultirilgan gaz yetkazib berishda aholidan 2,2 mlrd so‘m atrofida asossiz haq olingani aniqlandi

Bu haqda Raqobatni rivojlantirish va iste’molchilar huquqlarini himoya qilish qo‘mitasi ma’lum qildi.

2025-yilning o‘tgan davrida Raqobat qo‘mitasiga gaz ta’minoti bilan bog‘liq masalalar yuzasidan jami 19 487 ta murojaat kelib tushgan. Bu sohada tizimli muammolar mavjudligini ko‘rsatadi.

Shu munosabat bilan Qo‘mita tomonidan «Hududgazta’minot» aksiyadorlik jamiyati hamda to‘g‘ridan to‘g‘ri uning tasarrufida bo‘lgan hududiy gaz ta’minoti korxonalarida o‘rganish ishlari amalga oshirildi.

«Hududgazta’minot» AJ hamda to‘g‘ridan to‘g‘ri AJning bo‘ysunuvida bo‘lgan korxonalarda o‘rganish ishlari o‘tkazilganda o‘tgan davrda respublikaning beshta viloyatida aholiga tarqatilgan maishiy gaz ballonlarida suyultirilgan gazning og‘ir qoldiqlari (kondensat) hajmi jami 1,5 ming tonnani tashkil qilishi aniqlangan.

Bunda:

Navoiyda — 92,9 tonna,

Surxondaryoda — 490,2 tonna;

Qashqadaryoda — 371,3 tonna;

Farg‘onada — 370,5 tonna;

Buxoroda — 175,6 tonna.

Ma’lum bo‘lishicha, buning hisobiga iste’molchilardan umumiy hisobda 2,2 milliard so‘m atrofida ortiqcha mablag‘ undirilgan.

Xususan, Navoiy viloyatida «Hududgaz Navoiy» filiali tomonidan gaz ballonlaridagi 92,9 tonna og‘ir qoldiq suyuqlik uchun iste’molchilardan 125,4 million so‘m ortiqcha haq olingan.

Surxondaryo viloyatida esa «Hududgaz Surxondaryo» filiali tomonidan 79 nafar iste’molchiga nisbatan 125,7 million so‘m miqdorida ortiqcha hisob-kitob qilingani va jami 490,2 tonna og‘ir qoldiq uchun 640,3 million so‘m mablag‘ undirilgani, umumiy hisobda 766 million so‘m ortiqcha haq olingani aniqlangan.

Ushbu holatlar bo‘yicha Qo‘mita tomonidan gaz ta’minoti korxonalari tomonidan xizmat ko‘rsatish jarayonida qonun talablari buzilganligi belgilanib, iste’molchilardan ortiqcha undirilgan mablag‘larni qayta hisob-kitob qilish choralari ko‘rilmoqda.

Raqobat qo‘mitasi bu yo‘nalishdagi o‘rganish ishlarini respublika hududlari kesimida tizimli ravishda davom ettirmoqda.