Pokistonda yog‘ingarchilik tufayli 293 kishi halok bo‘ldi
08.09.2024 16:13
Pokistonda so‘nggi ikki oy ichida musson yomg‘irlari sabab bo‘lgan tabiiy ofatlarda jami 293 kishi halok bo‘ldi, yana 564 kishi jarohat oldi, deb xabar bermoqda Xinhua agentligi.
Kuchli yog‘ingarchilik mamlakatning ayrim hududlariga jiddiy zarar yetkazishda davom etmoqda. Bu haqda tabiiy ofatlarga qarshi kurash milliy boshqarmasi xabar berdi.
Boshqarma ma’lumotlariga ko‘ra, kuchli yog‘ingarchilik tufayli mamlakat bo‘ylab 19572 ta uy, 39 ta ko‘prik va bir qancha maktablar qisman yoki to‘liq zarar ko‘rgan. 1 iyuldan 31 avgustga qadar qariyb 1077 bosh chorva mollari ham nobud bo‘lgan.
Zarar va qurbonlarning aksariyati sharqiy Panjob provinsiyasida qayd etilgan bo‘lib, u yerda 112 kishi halok bo‘lgan va 302 kishi yaralangan, keyin shimoli-g‘arbiy Xayber-Paxtunxva provinsiyasida 88 kishi halok bo‘lgan va 129 kishi yaralangan.
Yaqin kunlarda Pokistonning ba’zi hududlarida mo‘tadil va kuchli yomg‘ir mavsumi kutilmoqda.
.jpg&w=3840&q=75)
