Messenjer egasi oʻzining rasmiy kanalida ilk marta Fransiyada hibsga olingani yuzasidan rasmiy munosabatini bildirdi.
“Men Parijga kelganimdan keyin 4 kun davomida politsiya soʻroq qildi. Fransiya rasmiylari Telegramʻdan boshqalarning noqonuniy foydalangani uchun shaxsan javobgar boʻlishim mumkinligini aytishdi”, – deydi bundan hayratlanganini qoʻshimcha qilarkan Pavel Durov.
“Telegramʻning Yevropa Ittifoqida rasmiy vakili bor, u Yevropa Ittifoqi soʻrovlarini qabul qiladi va ularga javob beradi. Uning elektron pochta manzili har bir kishi uchun ochiq edi.
Fransiya hukumati men bilan bogʻlanish va yordam soʻrashning koʻp usullariga ham ega edi. Fransiya fuqarosi sifatida men Dubaydagi konsullikka tez-tez borib turar edim. Bir muncha vaqt oldin, mendan soʻralganda, men ularga Fransiyada terrorizm tahdidiga qarshi kurashish uchun Telegram maxsus platformasini yaratishda shaxsan yordam berganman.
Agar mamlakat Internet xizmatidan norozi boʻlsa, odatda, xizmatning oʻziga nisbatan qonuniy choralar koʻriladi. Bosh direktorni u boshqarayotgan platformada uchinchi shaxslar tomonidan sodir etilgan jinoyatlarda ayblash uchun smartfon yaratilishidan oldingi qonunlardan foydalanish notoʻgʻri yondashuv”, – deb yozadi u.
Durov, shu bilan birga, Telegram foydalanuvchilari soni 950 millionga yetgani, obunachilarning koʻpayishi esa oʻz-oʻzidan jinoyatchilarning platformadan suiisteʼmol qilishi holatlarini koʻpaytirganini, kelgusida esa bu kabi holatlarning oldini olishni maqsad qilganini taʼkidlaydi.
“Umid qilamanki, avgust voqealari Telegram va umuman ijtimoiy media sohasini xavfsizroq va kuchliroq qiladi”, – deydi Pavel Durov.
