Qirgʻiziston prezidenti Sadir Japarovning bugun, 5-sentyabr kuni imzolangan farmoni bilan Oʻzbekistondan madaniyat va sanʼat sohasidagi ikki vakilga fahriy unvon berildi.
Unga koʻra, Oʻzbekiston Madaniyat vaziri Ozodbek Nazarbekovga Qirgʻiziston xalq artisti faxriy unvoni, Yunus Rajabiy nomidagi Oʻzbek milliy musiqa sanʼati instituti “Anʼanaviy maqom ijrochiligi” kafedrasi katta oʻqituvchisi Farangiz Mahmudovaga Qirgʻizistonda xizmat koʻrsatgan artist unvoni topshirildi.
Shuningdek, Ozodbek Nazarbekov Qozogʻiston Respublikasining ikkinchi darajali “Dostыq” (“Doʻstlik”) ordeni bilan ham taqdirlandi. Mukofotni Qozogʻiston prezidenti Qosim-Joʻmart Toʻqayev nomidan ushbu mamlakatning yurtimizdagi favqulodda va muxtor elchisi Beybut Atamqulov topshirdi.
Qozogʻiston elchisi Beybut Atamqulov, shuningdek, Oʻzbekiston Yozuvchilar uyushmasi raisi, xalq shoiri Sirojiddin Sayyidga prezident Q.J. Toʻqayev farmoni asosida “Hurmat” ordenini topshirgan.
