Samarqandda koʻp qavatli uyning 10-qavatida oʻzboshimchalik bilan basseyn qurilganligi aniqlandi.
Qayd etilishicha, murojaatlarga asosan Samarqand viloyati hududiy qurilish va uy-joy kommunal xoʻjaligi sohasida nazorat qilish inspeksiyasi tomonidan oʻtkazilgan reyd tadbirlari davomida Samarqand shahar “Sugʻdiyona” mahallasidagi 67-A sonli koʻp qavatli uyning 10-qavat pentxaus qismida oʻzboshimchalik bilan basseyn qurilgani aniqlangan.
“Basseyn koʻp qavatli uyning loyihasida nazarda tutilmagan. Seysmik hodisa vaqtida binoning tebranishini kuchaytirib, seysmik mustahkamligiga zarar yetkazishi mumkin”, deyiladi xabarda.
Inspeksiya xodimlari tomonidan mulkdorga nisbatan Maʼmuriy javobgarlik toʻgʻrisidagi kodeksning 159-moddasiga (Turar joylarni saqlash va ulardan foydalanish qoidalarini, uy-joy fondidan texnik foydalanish qoidalari va normalarini, koʻp kvartirali uylarni boshqarish qoidalarini buzish) asosan maʼmuriy jarimalar qoʻllanildi va majburiy koʻrsatmalar berildi.
Majburiy koʻrsatmada berilgan vaqt ichida mulkdor holatni oʻz ixtiyori bilan bartaraf qilib, uyni oldingi holatiga qaytarmasa unga nisbatan tegishli hujjatlar toʻplanib, majburiy tartibda bartaraf etish yuzasidan fuqarolik ishlari boʻyicha sudga daʼvo arizasi kiritiladi.
