1-sentyabr kuni Surxondaryo viloyati Boysun tumanidagi konda oltingugurt gazi chiqishi kuzatildi. Bu haqda Favqulodda vaziyatlar vazirligi xabari berdi.
Soat 15:17 da tumanning “Koʻlqamish” MFY hududida joylashgan “Mustaqillikning 25 yilligi” koniga qarashli 604-sonli qudugʻida burgʻilash ishlari olib borilayotgan boʻlgan. Shu vaqtda texnologik jarayonning buzilishi sababli oltingugurt (vodorod sulfid) gazi chiqishi kuzatilgan.
Aholi xavfsizligini taʼminlash maqsadida kon yaqinida yashovchi fuqarolar xavfsiz hududga evakuatsiya qilingan.
“Fuqarolarning jarohat olish va halok boʻlish holatlari qayd etilmagan. Vaziyat toʻliq nazorat ostida. Vahimaga oʻrin yoʻq”, — deb qoʻshimcha qildi vazirlik.
Surxondaryo viloyati hokimligi xabar berishicha, hududga viloyat rahbari Ulugʻbek Qosimov, aloqador mutasaddi tashkilot va idoralar hamda boshqarmalar masʼullari yetib borgan.
Favqulodda holat sodir boʻlgan hududda havoning ifloslanish darajasini oʻrganish, kelib chiqqan holatlarni bartaraf etish boʻyicha ishlar olib borilmoqda.
