Xususan, mahkumlarning insonparvar munosabatda boʻlish, shaʼni va qadr-qimmatini hurmat qilish huquqlarini taʼminlash, Ombudsman, Bolalar ombudsmani, inson huquq va erkinliklarini himoya qilish boʻyicha xalqaro organlarga murojaat qilish boʻyicha oʻzgartirishlar kiritilmoqda.
Bundan tashqari, ogʻir va oʻta ogʻir jinoyatlar sodir etganlik uchun ozodlikdan mahrum qilish joylarida oʻtkazilayotgan mahkumlarning saylov va referendumlarda ishtirok etish huquqi kafolatlanadi.
Shuningdek, agar mavjud boʻlgan barcha ichki himoya vositalari tugatilgan boʻlsa, bunday mahkumlarning Oʻzbekiston qonunchiligi va xalqaro shartnomalariga muvofiq inson huquqlari va erkinliklarini himoya qilish boʻyicha xalqaro organlarga murojaat qilish huquqi ham nazarda tutilgan. Ilgari qonunchilikda mahkumlarning xalqaro inson huquqlari tashkilotlariga murojaat qilish huquqi nazarda tutilmagan edi.
Oʻzgartishlarda bunday mahkumlar, agar qonun hujjatlariga muvofiq va sud hukmi asosida ushbu huquqdan mahrum etilmagan boʻlsa, saylovlar va referendumlarda qatnashish huquqiga ega ekani belgilab qoʻyilgan.
Hujjatga koʻra, mahkumlar yangilangan Konstitutsiyaning 28-moddasi oltinchi qismida nazarda tutilganidek, insonparvar muomala qilish, insonga xos boʻlgan shaʼni va qadr-qimmatini hurmat qilish huquqiga ega.
Jazoni ijro etish muassasalari xodimlari mahkumlarga nisbatan insoniy munosabatda boʻlishga majburdirlar. Mahkumlarga nisbatan intizomiy jazo choralari va boshqa majburlov choralarini qoʻllashda Jinoyat-protsessual kodeksida belgilangan asoslar va tartiblardan chetga chiqishga yoʻl qoʻyilmaydi.
Mahkumlarga ularning roziligisiz tibbiy va ilmiy tajribalar oʻtkazish mumkin emasligi qatʼiy belgilandi.
Bundan tashqari, yangi norma mahkumlarning Ombudsman va Bolalar ombudsmani bilan murojaat qutisi orqali bogʻlanishi, u orqali murojaatlarni tashkil etish, ochish, foydalanish, shuningdek yuborish tartibini belgilab beradi.
