O‘zbekiston Ekologik partiyasi Markaziy Kengashi raisining Axborot siyosati masalalari bo‘yicha o‘rinbosari Kamol Jumaniyozov brifingda partiyaning dasturlari va maqsadlari xususida ommaviy axborot vositalari vakillariga ma’lumotlar berdi.
Brifingda partiya Oliy Majlis Qonunchilik palatasi deputatligiga bir mandatli okruglar (majoritar tizim) boʻyicha 75 nafar, partiyaviy roʻyxat (proporsional tizim) boʻyicha 100 nafar yuqoridagi mezonlar asosida saralab tanlangan nomzodlar koʻrsatgani ma’lum qilindi.
Oliy Majlis Qonunchilik palatasi deputatligiga nomzodlarning 44,6 foizi ayollardan iborat boʻlib, barcha 175 nafar nomzod oliy maʼlumotga ega, ularning 31,5 foizini ekologlar, 10 foizini huquqshunoslar, 9 foizini tibbiyot, 1.5 foizini iqtisodiyot va boshqa sohalar vakillari tashkil etadi. Shuningdek, nomzodlarning 26 nafarini yuqori malakali olimlar tashkil etadi.
Bundan tashqari, partiyaning saylovoldi dasturi oʻzbek, rus, qoraqalpoq tillarda hamda koʻzi ojizlar uchun Brayl alifbosida tayyorlangan hamda 25 mingdan ziyod nusxada chop etilgan.
Kamol Jumaniyozovning ta’kidlashicha, Ekopartiya “Tabiat uchun birlashaylik” shiorini ilgari suradi va tabiatning bugungi ovoziga quloq tutadi. Barchani sogʻlom va barqaror kelajak sari, koʻz oldimizda namoyon boʻlib turgan tizimli ekologik muammolarga qarshi hayotiy yechimlarga erishish tomon boshlaydi.
Aholining qulay atrof-muhitga ega boʻlish huquqlarini roʻyobga chiqarish partiyaning asosiy maqsadlaridan biri. Buning uchun biz tuman (shahar)larning bosh rejasi tasdiqlanmagunga qadar qurilish ishlarini toʻxtatib turishni taklif etmoqda. Chunki, bugungi kunda viloyatlar va tuman, shahar markazlarida bosh rejasiz, oʻzboshimchalik bilan, shaharsozlik talablariga rioya qilmasdan olib borilayotgan qurilishlar tufayli nafaqat atrof-muhitga balki insonlar salomatligiga ham zarar yetmoqda.
Bundan tashqari, partiya mamlakatning yoʻl infratuzilmasi uchun ajratiladigan summaning muayyan qismini majburiy ravishda piyodalar yoʻlakchalarini tashkil etishga yoʻnaltirish zarur deb hisoblashini ta’kidladi. Boisi hozirda katta shaharlarimizda haydovchilar manfaati oddiy piyodalarnikidan koʻra ustuvor boʻlib bormoqda.