Istanbulda bugun, 3 avgust kuni Ayasofya masjidi yonidagi maydonda Falastinni qo‘llab-quvvatlash hamda 31 iyul kuni Eronda o‘ldirilgan HAMAS harakati Siyosiy byurosi rahbari Ismoil Xoniya xotirasiga bag‘ishlangan miting bo‘lib o‘tdi. Bu haqda TRT Haber telekanali xabar berdi.
“Politsiya voqea sodir bo‘lgan hududda kuchaytirilgan xavfsizlik choralarini ko‘rdi va hech qanday noxushlik sodir bo‘lgani yo‘q”, deyiladi xabarda.
Bir vaqtning o‘zida bir necha davlatda bo‘lib o‘tgan aksiya Turkiyadagi nodavlat tashkilotlar tomonidan uyushtirilgan. Qayd etish joizki, Xoniya o‘limidan oldin 3 avgust kuni butun dunyo bo‘ylab G‘azo sektori aholisini qo‘llab-quvvatlash uchun namoyishlar o‘tkazishga chaqirgandi.
Istanbuldagi mitingda ishtirokchilar “Falastinga ozodlik”, “Qotil AQSH, Falastindan ket”, “Isroil, G‘azodan ket”, “Qalbimiz HAMAS bilan, qarshilikni qo‘llab-quvvatlaymiz” degan shiorlar yozilgan plakatlarni qo‘llarida ushlab turdi.
Miting tashkilotchilaridan biri, lim Yayma jamg‘armasi Vasiylik kengashi raisi, Turkiya Prezidentining o‘g‘li Bilol Erdo‘g‘on G‘azodagi inqirozning mintaqaga tarqalishi va butun dunyoga tahdid solayotgani G‘arbning aybi ekanini aytdi.
"Isroil Xoniyani xoinlik bilan o‘ldirdi. Siyosiy qarashlaridan qat’i nazar, bu shanba uning adolatli ishini davom ettirishimizga sabab bo‘lsin. G‘azoda genotsid sodir etilmoqda, bunga chek qo‘yish kerak. Ertami-kechmi Isroil insoniyatga qarshi jinoyatlar uchun javob beradi”, deydi u.
