Xususan, O’zbekiston Ekologik partiyasi vakiliga quyidagi savollar berildi.
— Mashinalar ko‘pligi tufayli nafaqat havoga chang ko‘tarilyapti, balki avariyalar ko‘paymoqda. Partiyada yo‘l harakati xavfsizligini taʼminlashga oid biron bir taklif bormi?
Dildora Kamolova, partiya vakili:
— Hozirda yo‘l harakati qoidalari Hukumat qarori bilan tartibga solingan. Yo‘l harakati qoidalari bevosita inson hayoti va salomatligi bilan bog‘liq. Shunday ekan, partiyamizning qatʼiy pozitsiyasi shunday-ki, yo‘l harakati qoidalari aynan Qonun bilan tartibga solinishi kerak.
Bu taklif aholimizni qiynab kelayotgan yo‘l-transport hodisalari va ularning oqibatlari muammosi bilan chambarchas bog‘liq. Jahon sog‘liqni saqlash tashkilotining maʼlumotlariga ko‘ra, har yili yo‘l-transport hodisalarida 1 milliondan oshiq odam vafot etadi.
BMT Bosh Assambleyasi yo‘l-transport hodisalari oqibatida o‘lim va jarohatlar sonini kamaytirish bo‘yicha rezolyutsiyada davlatlarni qonunlarni qabul qilishga daʼvat etgan.
Yo‘l harakati xavfsizligini tartibga solishni qonunosti hujjatlaridan, qonun asosida tartibga solishga o‘tkazish mavjud muammolarni tizimli va kompleks tarzda hal qilishga imkon beradi.
— Ekologiyani ifloslantirishda sanoat korxonalari, oqava suv tozalash inshoatlari o‘rni yuqori. Ayrim hollarda ulardan chiqayotgan badbo‘y hidni aytmasa ham bo‘ladi. Bu masalada partiyada aniq takliflar bormi?
— Rivojlangan Yevropa davlatlari tajribasida badbo‘y xidlar tarqatayotgan ishlab chiqarish korxonlari o‘sha yerda yashovchi aholining sog‘lig‘iga, hayotiga va mulkiga nisbatan zarar yetkazgani uchun kompensatsiya to‘lab berishadi.
Bizda ham xorij tajribasi kabi davlat ushbu holatlarni oldini olish choralarini ko‘rish kerak. Shunday hududlar aholisining sog‘ligi yoki mulkiga yetkazilgan zarar uchun kompensatsiya berish tartibini joriy qilish kerak, deb hisoblaymiz!
Partiyamiz dasturida ham maishiy chiqindilar, atrof-muhit ifloslanishi va zararli gaz tashlamalarini kamaytirish;
– oqova suvlarni tozalash inshootlari samaradorligi past bo‘lgan hududlarda oqova suvlarni tozalash inshootlarini modernizatsiya qilish va yangilarini qurish;
– aholi yashash punktlarida badbo‘y hid chiqarayotgan, lokal oqova suv tozalash inshootlari bo‘lmagan korxonalar faoliyatini ekologik talablarga javob beradigan texnologiyalar joriy etilmaguncha to‘xtatish tartibini kiritish bo‘yicha aniq takliflarimiz mavjud!