Xususan, “Milliy tiklanish” demokratik partiyasi vakiliga quyidagi savollar berildi.
— Mahalla va mahalla yettiligining huquq va vakolatlarini mustahkamlash bo‘yicha partiyaning rejalari bormi?
Jahongir Shirinov, partiya vakili:
— Mahallani jamoatchilik hamda davlat organlari o‘rtasida “ko‘prikka” aylantirish, xususan, “Eshituvchi davlat” konsepsiyasi doirasida mahallaning davlat va xalq o‘rtasidagi ko‘prik vazifasini keng yo‘lga qo‘yish borasida takliflar bildiryapmiz.
Bundan tashqari, biz bugungi kunda belgilangan moliya, soliq, bandlik kabi idoralarning kamida 30 foiz vakolatlarini mahalla darajasiga tushirish, mahallalarda 100 dan ortiq davlat xizmatlarini “bir qadam”da ko‘rsatishni yo‘lga qo‘yish, mahallalarni hududlardagi muammolarni hal etishi uchun ularga ajratiladigan mablag‘lar miqdorini kamida 3 barobar ko‘paytirish kabi aniq vazifalarning ijrosi ustida ham qatʼiy nazoratni olib boramiz.
“Mahalla oqsoqoli, uning yordamchilari vakolat muddatlarini besh yilga uzaytirish, ko‘pi bilan ikki marta saylanish tartibini joriy etish” tashabbusini ilgari suryapmiz.
— Hududiy va davlat dasturini tuzishda deputatlarni roli va ishtiroki bormi o‘zi? “Milliy tiklanish” partiyasining xalq vakillarining bu faoliyatini yaxshilash rejasi bormi?
— Deputatlarning soni ko‘p. Ular turli masalalar bo‘yicha takliflarni ko‘taradi.
Hamma deputatlarning takliflarini dasturlarga kiritish imkoniyati cheklangan. Buni to‘g‘ri tushunishimiz kerak. Ayrim masalalar vaqt talab qiladi, yaʼni 2-3-yildan keyin ham tegishli dasturlarga kiritilishi mumkin. Buni inobatga olish kerak.
Ayrim masalalar esa katta mablag‘ talab qiladi. Ularni tegishli imkoniyatlarni inobatga olgan holda amalga oshirish kerak bo‘ladi.
O‘tgan yili partiyamiz deputatlari tomonidan 500 ga yaqin masala-taklif sessiyalar kun tartibiga kiritilgan. 800 dan ortiq masala doimiy komissiya yig‘ilishlariga olib chiqildi.
Shuning uchun ham partiyamiz o‘zining saylovoldi dasturida hududiy va davlat dasturlari loyihasini ko‘rib chiqish uchun barcha darajadagi deputatlarga majburiy taqdim etishni taklif etmoqda.