Maktabga kechroq borganlar uchun tezkor tizim joriy etilishi mumkin
04.10.2024 16:55
O‘zbekiston Xalq demokratik partiyasi birinchi sinfga turli sabablarga ko‘ra kech borgan bolalar uchun tezlashtirilgan ta’lim tizimini joriy etish taklifini berdi.
O‘zbekiston XDPning birinchi sinfga kech borgan bolalar uchun tezlashtirilgan ta’lim berish va o‘zining yoshiga mos yuqori sinfga o‘tkazish tartibini joriy etish tashabbusi ularning intellektual, ijtimoiy va emotsional rivojlanishi uchun qulay muhit yaratish zarurligi bilan asoslanadi.
Partiyaning ta’kidlashicha, mazkur yondashuv o‘quv jarayonining har bir o‘quvchining ehtiyojlari va xususiyatlariga mos kelishini ta’minlash imkonini beradi, bu esa ularning ta’lim natijalarini yaxshilashga va o‘quv jarayonidan umumiy qoniqishga olib keladi.
Eng yaxshi ta’lim tizimiga ega mamlakatlardan biri Finlandiyada ham bolalarni yoshi va tayyorgarlik darajasiga mos keladigan sinflarga o‘tkazish amaliyoti mavjud. Bu o‘quv natijalarini yaxshilashga va o‘quvchilarning maktabga yaxshiroq moslashishiga yordam beradi.
Ta’lim sohasidagi yuqori standartlari bilan tanilgan Singapurda ham o‘quv jarayonini optimallashtirish va iqtidorli o‘quvchilarni qo‘llab-quvvatlash uchun ularni yuqori sinflarga o‘tkazish tizimi qo‘llaniladi.
Partiyaning qo‘shimcha qilishicha, ular ushbu tashabbus ijobiy va yaxshi natija berishiga ishonmoqda va uning ustida anchadan beri ish olib bormoqda.