O‘zbekiston yana ATR-72-600 samolyotlarini xarid qilmoqchi

27-avgust kuni Investitsiyalar, sanoat va savdo vazirining o‘rinbosari Akram Aliyev Fransiyaning Airbus va ATR kompaniyalari vitse-prezidentlari Jak Garrig hamda Jerom Gabori boshchiligidagi delegatsiyani qabul qildi. Uchrashuvda fuqarolik aviatsiyasidagi hamkorlikni kengaytirish, xususan, samolyotlar xaridi, parvozlar geografiyasini oshirish, turizmni qo‘llab-quvvatlash masalalari muhokama qilindi, deb xabar bermoqda vazirlik matbuot xizmati.

Akram Aliyev kompaniya rahbarlari bilan yurtimizda texnik xizmat ko‘rsatish markazlari tashkil etish va xalqaro standartlar asosida aviatsiya xodimlarini tayyorlash dasturlarini yo‘lga qo‘yish masalalarini ham muhokama qildi.

2022-yil oktyabrda Prezident Shavkat Mirziyoyev ATR samolyotlarini xarid qilish uchun 50 mln dollar miqdorida kredit ajratilishini ma’qullagan edi. 2023-yil martda birinchi samolyot O‘zbekistonga yetkazilgan.

Shundan so‘ng Uzbekistan Airways Airbus koporatsiyasi bilan 12 samolyot va 2 vertolyot xaridi bo‘yicha 815,3 mln dollarlik shartnoma ham tuzgan edi.

1981-yilda Airbus va Italiyaning Leonardo kompaniyasi bilan qo‘shma korxona sifatida tashkil etilgan ATR bugungi kunda turbovintli mahalliy yo‘nalishlarga parvoz qiluvchi samolyotlar ishlab chiqarishda jahon yetakchisi hisoblanadi. Kompaniya faoliyati davomida 100 dan ortiq mamlakatdagi 200 dan ortiq aviakompaniyaga 1700 dan ziyod samolyot yetkazib berdi.

Ayni paytda Silk Avia aviakompaniyasi ixtiyorida 5 ta ATR-72-600 samolyotlari mavjud bo‘lib, bu uchoqlardan asosan O‘zbekistonda ichki reyslarda, shuningdek, Qirg‘izistonning Issiqko‘l sohilidagi Tomchi aeroportiga parvozlarda foydalanib kelinadi. Uning o‘z sahniga 70 nafar yo‘lovchi oladi.

Silk Avia avvalroq 1-sentyabrdan 24-oktyabrgacha Namangan shahriga parvozlar to‘xtatilishi, Termiz, Buxoro, Farg‘ona va Navoiy shaharlariga qatnovlar soni texnik sabablarga ko‘ra qisqartirlishini xabar qilgan edi.