Pavel Durov messenjerning maxfiylik va xizmat shartlari o‘zgarganini ma’lum qildi. Unga ko‘ra, endilikda jinoyatchilarning IP manzillari va telefon raqamlari qonuniy talablarga asosan, tegishli organlarga oshkor qilinishi mumkin. Ushbu chora messendjerning qidiruv bo‘limida sodir etilishi mumkin bo‘lgan jinoyatlarni to‘xtatish maqsadida joriy qilinadi.
Pavel Durov maxfiylik shartlaridagi o‘zgarishlarni shunday izohlaydi:
“Telegram'ning qidiruv funksiyasi boshqa dasturlarnikiga qaraganda kuchliroq edi. Afsuski, odamlar undan yomon maqsadlar yo‘lida, bizning xizmat ko‘rsatish shartlarimizni buzgan holda, noqonuniy tovarlarni sotish uchun foydalandi. So‘ngi bir necha haftada maxsus moderatorlar jamoasi sun’iy intellektdan foydalangan holda Telegram'dagi qidiruv bo‘limini nisbatan xavfsiz qildi. Biz qidiruvda aniqlagan barcha muammoli kontentlar endi mavjud emas. Agar siz Telegram qidiruvida hali ham qandaydir xavfli yoki noqonuniy ma’lumot topsangiz, @SearchReport orqali bizga xabar bering”.
Avvalroq Fransiya hukumati Durovni Telegram'dan jinoiy maqsadda foydalanishlarni oldini olmaganlikda ayblab, hibsga olgan edi.
