Telegram’da yangilanishlar: endi ommaviy postlarni qidirish mumkin

Yangilanishlar orasida eng asosiy funksiyalardan biri — ommaviy postlarni qidirish. Endi «Postlar» sahifasida turli kanallardan tegishli ma’lumotlarni bir interfeysda ko‘rish mumkin. Avval boshda bu imkoniyat faqat Telegram Premium foydalanuvchilariga taqdim etiladi.

Yana bir muhim yangilik — hikoyalar albomlari. Foydalanuvchilar va kanal egalari hikoyalarni mavzularga ko‘ra albomlarga jamlay oladi. Masalan, sayohat fotolari, mahsulotlar namoyishi yoki memlar to‘plami. Bu bizneslar va kontent yaratuvchilar uchun ham qo‘shimcha imkoniyat hisoblanadi.

Hadyalar kolleksiyalari funksiyasi esa profil yoki kanaldagi hadyalarni turkumlarga bo‘lib saqlash imkonini beradi. Bir hadya bir necha kolleksiyada bo‘lishi mumkin va ular filtrlar yordamida tez topiladi. Shuningdek, profil reytingi tizimi joriy etildi — u foydalanuvchining Telegram Yulduzlar orqali amalga oshirgan muvaffaqiyatli operatsiyalariga qarab shakllanadi.

Platformada premium hadyalar ham yo‘lga qo‘yiladi, ular cheklangan miqdorda va faqat Premium a’zolari uchun sotiladi. Shu bilan birga, @BotFather endi mini ilovada ishlaydi, bu esa botlar yaratish va boshqarish jarayonini soddalashtiradi.