10.08.2024 00:28
Qozog‘istonning sobiq ichki ishlar vaziri Erlan Turgumbaev 2022 yilning yanvar oyidagi namoyishlarga doir ish bo‘yicha mansab vakolatini suiiste'mol qilganlikda aybdor deb topildi va shartli ravishda 5 yilga ozodlikdan mahrum qilindi. Bu haqda “Zakon.kz” xabar berdi.
Jinoyat ishlari bo‘yicha Ostona tumanlararo sudida davlat ayblovchisi Turgumbaevga besh yillik qamoq jazosi berishni so‘ragan. Sud esa sobiq ichki ishlar rahbari o‘z aybiga iqror bo‘lgani, chin ko‘ngildan pushaymonligi, ilk bor jinoyat sodir etgani, shuningdek, jinoyat tarkibida korruptsiya holati yo‘qligini inobatga olib, Turgumbaevga nisbatan shartli jazo tayinlagan.
Shuningdek, Erlan Turgumbaev 10 yil muddatgacha muayyan lavozimlarni egallash huquqidan mahrum etildi. Sud, shuningdek, Qozog‘iston Prezidentiga Turgumbaevni maxsus unvon va davlat mukofotlaridan mahrum qilish taklifini bergan.
IIVning sobiq rahbari joriy yilning aprel oyida Qozog‘iston Jinoyat kodeksining 362-moddasi (og‘ir oqibatlarga olib kelgan hokimiyat va mansab vakolatlarini suiiste'mol qilish) 4-qismi bilan gumonlanib hibsga olingan edi. Ushbu moddaning eng yuqori jazosi esa 10 yilgacha ozodlikdan mahrum qilishni nazarda tutadi.
Ma'lumot uchun, Turgumbaev 2019 yildan 2022 yil fevral oyigacha Qozog‘iston IIV rahbari lavozimida ishlagan, shundan so‘ng Prezident Qosim-Jomart To‘qaev uni lavozimidan ozod etib, o‘zining maslahatchisi etib tayinlagan. 2023 yilda u Shanxay hamkorlik tashkilotining Mintaqaviy aksilterror tuzilmasi maslahatchisi bo‘lgan.
