Rossiya urushda yangi raketani ishga tushirib osmonda ustunlikka intilyapti

Rossiya harbiy-havo kuchlari o‘z tarixida ilk bor yangi avlod «havo-havo» raketa turi — «Izdeliye 180»ni amaliyotda qo‘llashni boshladi. Bu haqdagi fotodalillar internetda tarqaldi va Rossiya OAVlari tomonidan tasdiqlandi.

«Izdeliye 180», shuningdek K-77M nomi bilan ham tanilgan, ilgari ishlab chiqarilgan R-77 raketa turining modernizatsiya qilingan ko‘rinishi bo‘lib, yangi ikki bosqichli dvigatel, qayta ishlangan dumi qismlari va zamonaviy radiolokatsiya yo‘naltiruvchi bosh qismi bilan jihozlangan.

Raketa maxsus ravishda Su-57 tipidagi beshinchi avlod rus harbiy samolyoti uchun yaratilgan. Uning havodagi nishonlarga zarba berish radiusi 190 kilometrga yetkazilgan bo‘lib, bu uni g‘arbdagi eng ilg‘or analoglar bilan raqobatlashish imkonini beradi.

Analitiklar ta’kidlashicha, avvalgi R-77 versiyasi 70–80 km radiusda samarali bo‘lgan, lekin undagi to‘rsimon ruli konstruksiyada muammolar keltirib chiqargan. Yangi raketada esa ushbu elementlar butunlay yo‘q qilingan va aerodinamik jihatdan yaxshilangan.

Bundan tashqari, raketadagi navigatsiya tizimi sezilarli darajada takomillashtirilgani aytiladi — bu esa uning aniqligi va samaradorligini oshiradi.

Xalqaro harbiy tahlilchilar fikricha, Rossiya bu bilan o‘zining havo ustunligiga oid raqobatini kuchaytirishga harakat qilmoqda. Biroq, amaliyotda qanchalik samarali bo‘lishi hali aniq emas.