Rus amaldorlariga jamoat transportida yurish taklif qilinmoqda
05.09.2024 14:59
Rossiyada amaldorlarga jamoat transportida yurish majburiyatini yuklovchi qonun loyihasi koʻrib chiqilyapti. “Novыye lyudi” (“Yangi odamlar”) fraksiyasi Dumaga kiritgan qonun loyihasida barcha darajadagi hukumat organlari rahbarlari va parlament deputatlari uchun haftasiga ikki marta “Avtomobilsiz kun” joriy etish taklif qilinmoqda.
Ushbu tashabbus muallifi — deputat Vladimir Plyakin. “Avtomobilsiz kun” sanalari va tartibi hukumat aʼzolari tomonidan belgilanishi mumkin. Mualliflar yangi qonun amaldorlarga oʻz hududlaridagi jamoat transportidagi (va boshqa) muammolarni yaxshiroq tushunishda yordam berishiga umid qilishmoqda.
“Rahbarlar oʻrnak koʻrsatsa, boshqalar ham shaxsiy avtomobillaridan kamroq foydalanib, jamoat transportiga oʻtishlari mumkin. Natijada yoʻllarimiz ochiq, havomiz musaffo boʻladi”, — deyiladi qonun loyihasiga yozilgan izohda.
