Turkiyada boshqa ayollarning suratlariga layk bosgan erkak ajrimda aybdor deb topildi

Voqea Kayseri viloyatida yashovchi H.B. va S.B. ismli er-xotin bilan bog‘liq. Juftlik ajralish bo‘yicha sudga murojaat qilgan. Ayolning ta’kidlashicha, turmush o‘rtog‘i unga nisbatan doimiy haqoratlar qilgan, shaxsiy xarajatlari va ro‘zg‘or uchun yetarli pul bermagan va eng muhimi, boshqa ayollarning fotosuratlariga doimiy ravishda layk bosgan. Ayol sudga shikoyat qilarkan, bu xatti-harakatlar uning ruhiy holatiga salbiy ta’sir ko‘rsatganini, ishonchni izdan chiqarganini ta’kidlagan.

Erkak esa o‘z navbatida rafiqasini haddan tashqari rashk qilishda ayblagan, uning postlari ostida tanqidiy izohlar qoldirganini yoqtirmagan va ijtimoiy tarmoqlardagi xatti-harakatlarini shaxsiy erkinlik doirasida deb baholagan. U layk bosishni “zararsiz xatti-harakat” sifatida ko‘rsatishga harakat qilgan, ammo sud bu fikrni qabul qilmagan.

Kayseri oilaviy sudi sudyasi qarorida erkakning oila buzilishiga asosiy sababchiligini, ayolning esa qisman aybdorligini tan oldi. Shuningdek, sud quyidagi moliyaviy va moddiy kompensatsiyalarni belgiladi:

• er sobiq rafiqasiga 500 lira miqdorida vaqtinchalik aliment (taxminan 28 dollar) berishi ;

• ayolga 750 lira kambag‘allik nafaqasi (taxminan 40 dollar) to‘lanishi;

• yetkazilgan moddiy va ma’naviy zarar uchun 40 000 lira miqdorida tovon puli (taxminan 2 150 dollar) berilishi tasdiqlandi.

Erkak qaror ustidan apellyatsiyaga shikoyat qilgan bo‘lsa-da, sud ajralishdagi asosiy aybni erkakda qoldirdi. Shu bilan birga, sud kambag‘allik bo‘yicha aliment miqdorini oyiga 1000 liraga (54 dollar) oshirdi va ayolning ruhiy holatiga salbiy ta’sir ko‘rsatgan xatti-harakatlarni, xususan, “boshqa ayollarning fotosuratlariga layk bosish”ni qayd etib, nikohdagi ishonchni yo‘qotishga olib kelgan harakat uchun kompensatsiya 30 000 liragacha (1 600 dollardan ortiq) oshirildi.

Endilikda Turkiyada sudlar raqamli maydondagi xatti-harakatlarni — layk, izoh, repost va har qanday onlayn yaqin munosabatni oilaviy sadoqat darajasini baholashda hisobga oladi. Yuristlar fikricha, bu qaror kelgusida Turkiyadagi oilaviy nizolarning katta qismga yaqin qismida onlayn xatti-harakatlar asosiy dalil sifatida keltirilishi ehtimolini oshiradi