2024-yilning birinchi yarmida Yaponiyada 40 mingga yaqin odam oʻz uyida yolgʻiz vafot etdi. Ularning 4 mingga yaqini oʻlimidan bir oy oʻtib topilgan, 130 nafar odamning oʻlimi bir yil davomida aniqlanmagan. BMT maʼlumotlariga koʻra, Yaponiya hozir dunyodagi eng keksa aholiga ega, deb yozdi BBC Yaponiya politsiyasi hisobotiga tayanib.
Milliy politsiya agentligining 2024-yil birinchi yarmidagi maʼlumotlari shuni koʻrsatadiki, uyda yolgʻiz yashaydigan 37 227 kishi oʻlik holda topilgan, ularning 70 foizidan ortigʻini 65 va undan katta yoshdagilar tashkil qiladi. Agentlik oʻz hisoboti mamlakatda yolgʻiz yashayotgan va oʻlayotgan odamlar muammosiga oydinlik kiritilishiga umid qilmoqda.
Uyda yolgʻiz oʻlgan odamlarning taxminan 40 foizi bir kun ichida topilgan boʻlsa, oʻlimdan bir oydan koʻproq vaqt oʻtgach, 3939 jasad topilgan va 130 jasad topilgunga qadar kamida bir yil davomida aniqlanmagan.
Politsiya departamenti oʻz xulosalarini qarovsiz odamlar oʻlimi holatlarini tergov qiluvchi hukumat hayʼatiga taqdim qiladi.
Joriy yil boshida Yaponiya Milliy aholi va ijtimoiy xavfsizlik tadqiqotlari instituti yolgʻiz yashovchi keksa (65 yosh va undan katta) fuqarolar soni 2050-yilga borib 10,8 millionga yetishi kutilayotganini maʼlum qilgan edi. Xuddi shu yili bir kishi yashaydigan xoʻjaliklarning umumiy soni 23,3 millionga yetishi taxmin qilinmoqda.
Aprel oyida Yaponiya hukumati mamlakat aholisining qarishi bilan bogʻliq boʻlgan uzoq yillik yolgʻizlik va izolyatsiya muammosini hal qilishga qaratilgan qonunchilikni taqdim qildi.
Yaponiya uzoq vaqtdan beri oʻz aholisining qarishi va qisqarib borishiga qarshi kurash olib bormoqda, ammo mamlakatda bu oʻzgarishlarga dosh berish tobora qiyinlashmoqda.
Oʻtgan yili bosh vazir Fumio Kisida tugʻilish darajasining pasayishi tufayli Yaponiya jamiyat sifatida faoliyat yurita olmay qolish arafasida ekanini aytgan edi.
