33 ta shahar va tumanga Yangi O‘zbekiston qiyofasidagi tuman (shahar) maqomi beriladi

Qarorga ko‘ra, 33 ta shahar va tumanga Yangi O‘zbekiston qiyofasidagi tuman (shahar) maqomini berib, ularni aholining yashashi va tadbirkorlik faoliyati bilan shug‘ullanishi uchun namunali hududlarga aylantiriladi.

Ushbu hududlarning 14 tasiga 30 mlrd so‘mdan, 18 tasiga 100 mlrd so‘mdan va Norin tumani Sho‘rariq mahallasiga 10 mlrd so‘m mablag‘ ajratiladi.

«Yangi O‘zbekiston qiyofasidagi tuman (shahar)» loyihasi doirasida har yili quyidagilar amalga oshiriladi, jumladan:

• kamida 50 million AQSH dollari ekvivalenti miqdorida investitsiyalarni jalb qilgan holda oziq-ovqat, mebelchilik, qurilish materiallari, tikuvchilik va boshqa ixtisoslashgan yo‘nalishlarda kamida 10 tadan yirik investitsiya loyihalari ishga tushiriladi;
• ilgari o‘z mahsuloti bilan tashqi bozorlarga chiqmagan kamida 3–5 tadan korxona eksport faoliyatiga jalb qilinadi;
• xorijiy davlatlardan texnolog, marketolog, brend-menejer kabi mutaxassislarni jalb qilgan holda kamida 1 ta korxonada milliy brend mahsulotlar ishlab chiqarish yo‘lga qo‘yiladi;
• 10 nafardan tadbirkorlar xorijiy davlatlarda o‘tkaziladigan ixtisoslashgan sanoat ko‘rgazmalariga tajriba almashish uchun yuboriladi.

«Yashil» va energiya samarador hududlarni rivojlantirish doirasida:

• 2026-yil 1-yanvardan boshlab barcha davlat idoralari va ijtimoiy soha muassasalari binolari faqat energiya samaradorlik tamoyillari asosida quriladi va modernizatsiya qilinadi;
• 2027-yil 1-yanvarga qadar davlat idoralari, davlat ishtirokidagi korxonalar va ijtimoiy soha muassasalari energiya samarador uskunalar bilan to‘liq jihozlanadi.
• 2026-yil 1-martdan boshlab bittadan ijtimoiy soha muassasasi binolarini «Nol energiya sarfli binolar» konsepsiyasi asosida modernizatsiya qilish bo‘yicha pilot loyihalar boshlanadi.