Nigerning yirik shaharlaridan birida koʻchaga Putin nomini berishmoqchi. Bu haqda poytaxt Niamey va Zinder shaharlari merlari Bubakar Sumana Garanke va Maman Issufu bayonot berishdi, deb yozmoqda TASS.
Shuningdek, bayonotda Rossiya-Niger doʻstlik bogʻini barpo etish rejalashtirilgani aytilgan.
Zinder shahri meri Maman Issufu “Rossiya qiyin damlarda ularga yordamga kelganini” taʼkidlagan.
Maʼlumot uchun: 2023-yilda Nigerda davlat toʻntarishi oqibatida prezident Muhammad Bazum agʻdarilib, oʻrnini uning gvardiyasi rahbari Abdurahmon Chiani egalladi. Bu voqea Nigerning sobiq mustamlakachisi Fransiyaning noroziligi va qarshiligiga sabab boʻldi.
Shundan soʻng Nigerning yangi hukumati Rossiyadan harbiy-texnik koʻmak soʻragan. 2024-yilning aprelidan boshlab Rossiya Nigerni qurol-aslaha bilan taʼminlashni boshlagan.
Agʻdarilgan prezident Muhammad Bazum hamon isyonchilar qoʻlida.
