Xususiy maktabning 25 va 27 yoshli o‘qituvchilari ta’lim dargohining 9-sinf o‘quvchisini ketma-ket kaltaklagan. Mazkur huquqbuzarlik ko‘rilgan sud majlisida taraflar jarayonni videotasvirga olishga norozilik bildirdi.
27 yoshli o‘qituvchi o‘quvchisi darsga kech qolgani uchun chizg‘ich bilan urganini tasdiqladi.
O‘quvchim darsga kechikib keldi, lekin men unga tan jarohati yetkazish uchun urmadim, dedi sudlanuvchi o‘qituvchi.
Sudda so‘z olgan 25 yoshli o‘qituvchi ham aybini tan oldi.
Men o‘quvchimning kaft qismiga urdim. Ekspertiza xulosasida kaft qismiga zarar yetkazilgan desa, qonun oldida javob berishga tayyorman, dedi aybini tan olgan 25 yoshli o‘qituvchi ham.
O‘quvchining sudda tushuntirish berishicha, darsga kechikishining sababi bo‘lgan va bu uchun u ruxsat olgan.
Bu maktabda o‘tgan yili ham shunaqa holat bo‘lgan. Ko‘p o‘quvchilar buni ota-onasiga aytmay, berkitib kelgan, dedi jabrlanuvchi o‘quvchi.
Sudda tibbiy ekspertizasi xulosasi o‘qib eshittirildi. Maktab o‘quvchisiga yengil tan jarohati yetkazilgani tasdiqlandi.
Sud qaroriga ko‘ra, har ikki o‘qituvchiga bazaviy hisoblash miqdorining uch baravari miqdorida jarimaga tortildi.
