1-oktyabrdan O‘zbekiston qonunchiligida nimalar o‘zgaradi

Norma.uz yozishicha, 1-oktyabrdan quyidagi o‘zgarish va yangiliklar kuchga kiradi:

Moped va skuter haydovchilari uchun haydovchilik guvohnomasi majburiy bo‘ladi

Endilikda moped va skuterlarni faqat davlat ro‘yxatidan o‘tkazilgandan so‘ng va «A» toifali haydovchilik guvohnomasi bo‘lgan taqdirdagina boshqarish mumkin. Bu qoida ishchi hajmi 25 sm³ dan 50 sm³ gacha, elektr dvigateli quvvati 0,25 kVt dan 4 kVt gacha va tezligi 25–50 km/soat bo‘lgan moped va skuterlarga ham taalluqli.

Chiroyli avtoraqamlar savdosi bekor qilinadi

1-oktyabrdan «O‘zbekiston respublika tovar-xomashyo birjasi» (O‘zRTSB) orqali chiroyli avtoraqamlar auksioni o‘tkazilmaydi.

• Sotilmagan 1–3 toifadagi raqamlar Uzavtomotobelgi korxonasi orqali oshirilgan tarifda sotiladi.
• 4–6 toifadagi raqamlar esa amaldagi tartibda, qo‘shimcha to‘lovsiz beriladi.

Sudyalar uchun kurslar

Sudyalikka nomzodlar Davlat granti asosida Akademiyada 6 oylik qayta tayyorlov kurslarini o‘taydi. Kursga qabul qilinganlar asosiy ish joyidagi lavozimini saqlab qoladi va sudya yordamchisining oylik maoshi miqdorida stipendiya oladi.

Investitsiya platformalari va «Regulyatoriy qumxona»

1-oktyabr 2026-yilgacha maxsus huquqiy rejimda quyidagilarga ruxsat beriladi:

• qimmatli qog‘ozlarni joylashtirish va sotish,
• venchur va pay fondlarini moliyalash,
• kommandit sherikliklarga hissa kiritish.

Yer osti boyliklarini ishlatish ruxsatnomalari uchun to‘lovni bo‘lib-bo‘lib to‘lash

Polez qazilmalarni ochiq usulda qazib olish bilan shug‘ullanuvchi tadbirkorlarga ruxsatnoma auksion to‘lovini bo‘lib-bo‘lib to‘lash imkoni beriladi.

Auksionsiz yer maydonlarini ijaraga olish

Tadbirkorlar o‘z bino va inshootlariga tutash yerlarni ijaraga olishlari mumkin. (Ta’lim va tibbiyot muassasalari hududidan tashqari).

• Yer maydoni to‘g‘ridan to‘g‘ri ijaraga beriladi.
• Muddat – 1-yil, uzaytirish imkoniyati bilan.
• Ijara haqi yer solig‘i stavkasining 3 baravarigacha.
• Shartnoma elektron tarzda, DSQ nazoratida ro‘yxatdan o‘tkaziladi.

Xizmat safarlari hisoboti yagona platformada

Davlat xizmatchilarining ichki va xorijiy xizmat safarlari «Xizmat safari» modulida yuritiladi:

• reja va natijalarni onlayn kuzatish,
• xarajatlar va samaradorlikni baholash,
• har bir xizmat safari bo‘yicha hisobot taqdim etish.

Pensiya tayinlash va to‘lash jarayonlarini raqamlashtirish

«Xalq banki» orqali pensiya xizmatlari Face-ID va EHIM orqali ko‘rsatiladi.

• Ma’lumotlar Pensiya jamg‘armasi va «Xalq banki» so‘rovi asosida Adliya vazirligi tomonidan bepul beriladi.
• Qurilmalar xaridi Pensiya jamg‘armasi va «Xalq banki» hisobidan qoplanadi.
• Fuqarolarga pensiya tayinlashda amaliy yordam xizmati yo‘lga qo‘yiladi.

Oq shakar uchun aksiz bekor qilinadi

Aromatizator va bo‘yoq qo‘shilmagan oq shakarni O‘zbekistonga olib kirishda aksiz solig‘i olinmaydi.

«Yashil sertifikat»

Atrof-muhitga I va II toifada ta’sir etuvchi texnologik jarayonlar «Yashil sertifikat»ga ega bo‘lishi shart. Unga ega bo‘lmagan korxona mahsulot sertifikati ololmaydi.

• 2026-yil iyuliga qadar shartnoma tuzgan subyektlar uchun ekologik sertifikatlashtirish ishlari bepul amalga oshiriladi.

«Yagona oyna» orqali bojxona rasmiylashtiruvi

Tovarlarni olib kirish, olib chiqish va tranzit qilish bilan bog‘liq barcha hujjatlar faqat «Yagona oyna» bojxona axborot tizimi orqali rasmiylashtiriladi.

Subsidiya va grantlar – ijtimoiy karta orqali

Kambag‘allikni qisqartirish Davlat maqsadli jamg‘armasi hisobidan beriladigan subsidiya, grant va qarzlar bosqichma-bosqich fuqarolarga ijtimoiy karta orqali taqdim etiladi.