Kecha, 2-oktyabr kuni Osiyo Olimpiya kengashi vitse-prezidenti Otabek Umarov ayni kunlarda Toshkentda boʻlib turgan Osiyo Olimpiya kengashi direktori, Butunjahon suzish federatsiyasi prezidenti Husayn Al Musallam bilan uchrashdi. Bu haqda Milliy Olimpiya qoʻmitasi (MOQ) matbuot xizmati xabar berdi.
Poytaxtdagi Olimpiya va Paralimpiya shon-shuhrati muzeyida boʻlib oʻtgan uchrashuvda Musallam dastavval Olimpiya shaharchasidagi oʻrganish ishlari boʻyicha oʻz xulosalari bilan oʻrtoqlashdi.
Tadbirda Musallam Toshkentda 2025-yilgi yoshlar oʻrtasidagi Osiyo va Paraosiyo oʻyinlariga tayyorgarlik yaxshi ketayotgani, Olimpiya shaharchasidagi qurilish ishlari bir maromdaligi, shuningdek, tashkiliy ishlar ham koʻngildagidek yoʻlga qoʻyilganini taʼkidladi. Shu barobarda Musallam eʼtibor qaratilishi kerak boʻlgan qator masalalar boʻyicha ham oʻz tavsiyalarini berib oʻtdi. Rasmiylar ham boʻlajak oʻyinlarga katta hajmda tayyorgarlik koʻrilayotgani, jarayon shaxsan Prezidentning nazorati ostida ekanini bildirdi.
Suhbat davomida tomonlar oʻzaro hamkorlikning keyingi bosqichiga oid qator istiqbolli rejalarni koʻrib chiqdi.
Shundan soʻng Al Musallam zamonaviy qiyofa ochgan muzey bilan yaqindan tanishdi. Unda mehmonga oʻzbek sportining shonli tarixi, bugungi kundagi muvaffaqiyatlari haqida batafsil maʼlumot berildi. Yakunda u faxriy mehmonlar kitobiga oʻz dil izhorlarini yozib qoldirdi.
