“Bir necha soat oldin SAXAL Livan janubidagi “Hizbulloh” terrorchilik obyektlari va infratuzilmalariga qarshi aniq razvedka ma’lumotlari asosida cheklangan va maqsadli quruqlikdagi reydlarni boshladi. Ushbu inshootlar chegara yaqinidagi qishloqlarda joylashgan bo‘lib, Isroil shimolidagi isroilliklar jamoalariga bevosita tahdid soladi”, – deyiladi SAXAL bayonotida.
Dushanba kuni Isroil “Hizbulloh” jangarilari tomonidan doimiy ravishda o‘qqa tutilayotgan mamlakat shimoliy hududlarini himoya qilish uchun Livan chegarasi bo‘ylab quruqlikdagi operatsiyaga tayyorgarlik ko‘rayotgani xabar qilingan edi.
Dushanba kuni kechqurun Isroilda harbiy vazirlar mahkamasi yig‘ilishi bo‘lib o‘tdi. Isroil matbuotiga ko‘ra, u yerda Hizbullohga qarshi operatsiyaning navbatdagi bosqichi tasdiqlangan. AQSH Davlat departamenti matbuot kotibi Mettyu Miller brifingda Isroil rasmiylari Vashingtonni “qator amaliyotlar”, jumladan, Livandagi quruqlikdagi amaliyotlar haqida xabardor qilganini aytdi.
Dushanba kuni Yoav Galant Livan chegarasi yaqinida to‘plangan qo‘shinlarga murojaat qildi:
“(Hasan) Nasrullohning chetlatilishi muhim qadam, ammo oxirgi emas. Shimol aholisini o‘z uylariga eson-omon qaytarish uchun barcha imkoniyatlarimizni ishga solamiz, jumladan sizlarni ham”, – dedi u.
Dushanba kuni kechqurun SAXAL Isroilning Livan bilan chegarasidagi hududni yopiq harbiy zona deb e’lon qildi. Mintaqa chegaradagi nisbatan kichik hudud, ya’ni uch tomondan Livan hududi bilan o‘ralgan.
Hizbulloh rahbari o‘rinbosari Naim Kassemning aytishicha, guruh Isroil hujumiga tayyor. U guruh rahbari Hasan Nasrulloh va bir qator yuqori martabali qo‘mondonlarning o‘limi guruh uchun og‘ir zarba bo‘lganini tan oldi, biroq uning harbiy salohiyati saqlanib qolayotganini ta’kidladi.
.jpg&w=3840&q=75)
