O‘zbekiston iyun oyida dunyoda eng ko‘p oltin sotib oldi

Jahon oltin kengashi ma’lumotiga ko‘ra, 2025-yil iyun oyida dunyo bo‘ylab markaziy banklar jami 22 tonna oltin xarid qilgan. Bu talab uchinchi oy ketma-ket o‘sishda davom etayotganini ko‘rsatadi. Ushbu davrda eng yirik xaridor sifatida O‘zbekiston tan olindi — mamlakat 9 tonna oltin sotib olgan.

O‘zbekiston to‘rt oylik «sotuv rejimi»dan so‘ng bozorga qaytib, yana oltin zaxiralarini to‘plashni boshladi. Bu o‘zgarish mamlakatning valyuta-oltin zaxiralarini mustahkamlashga qaratilgan strategiyasi doirasida amalga oshirilgani taxmin qilinmoqda.

Qozog‘iston iyun oyida 7 tonna oltin sotib olib, ikkinchi o‘rinni egalladi. Xitoy, Turkiya va Chexiya esa har biri 2 tonnadon xarid qilgan. Shuningdek, G‘ana, Qatar, Filippin va Qirg‘iziston bir tonnadon oltin sotib olgan davlatlar qatorida qayd etilgan.

Mazkur oyda oltinning eng yirik sotuvchisi Singapur bo‘lib, u 6 tonna oltin sotgan. Bu ham markaziy banklar zaxira siyosatidagi faol harakatlardan dalolat beradi.

2025-yil boshidan buyon markaziy banklar jami 123 tonna oltin xarid qilgan. Bu o‘tgan yilning mos davridagi 130 tonnadan kamroq bo‘lsa-da, yuqori ko‘rsatkich hisoblanadi. Yil boshidan buyongi umumiy savdo bo‘yicha yetakchilar quyidagicha: Polsha — 67 tonna, Ozarboyjon — 35 tonna, Qozog‘iston — 22 tonna, O‘zbekiston esa 18 tonna oltin sotib olib, yetakchi davlatlardan biriga aylangan.