Vinisius qishki transfer oynasi vaqtida “Real”dan ketadi — insayder

Manbalarga ko‘ra, vinger “qirollik klubi” bilan yangi shartnoma borasida kelishuvga erisha olmayapti. Shu bois uning jamoadan ketishi ehtimoli ortgani aytilmoqda. Vinisiusga Angliyaning bir qator grand klublari — xususan, “Manchester Siti” va “Chelsi” jiddiy qiziqish bildirmoqda. Bundan tashqari, bir nechta Saudiya Arabistoni jamoalari ham braziliyalik futbolchini o‘z safiga qo‘shib olishga tayyor.

Avvalroq tomonlar o‘tgan hafta oxirida yangi shartnoma yuzasidan muzokara olib borishi haqida xabarlar chiqqandi. Biroq Vinisius jamoaning eng yuqori maosh oluvchi futbolchisiga aylanishni istayotgani, klub esa bu talabni bajarishga tayyor emasligi ortidan muzokaralar yana boshi berk ko‘chaga kirib qolgan.

Xabar qilinishicha, klub prezidenti Florentino Peres 2027-yilda Vinisius erkin agent sifatida jamoani tark etmasligi uchun uni yaqin vaqt ichida sotish variantini ham ko‘rib chiqmoqda.

Ma’lumot uchun, 25 yoshli Vinisius 2018-yildan beri “Real” sharafini himoya qilib keladi. Joriy mavsum futbolchi barcha musobaqalar doirasida 23 o‘yinda maydonga tushib, 6 ta gol va 5 ta golli uzatma muallifiga aylandi. Futbolchining amaldagi shartnomasi 2027-yilning iyun oyiga qadar mo‘ljallangan. Transfermarkt portali uning bozor qiymatini 150 million yevroga baholagan.