«Mening maktabim» doirasida loyiha kiritish bosqichi boshlandi

O‘quvchilar quyidagi usullardan foydalangan holda o‘z loyihalarini ilgari surishlari mumkin:

• avtomatik tarzda — loyiha namunalari orasidan o‘ziga yog‘gan loyihani tanlash orqali (shablon loyihalar ro‘yxati – bu yerda);
• mustaqil ravishda — taqdim etilgan loyiha namunalari orasida mavjud bo‘lmagan loyihalarni yangidan shakllantirish orqali.

Loyihaning 1-bosqichi doirasida 1, 2 va 4-toifaga kiritilgan 112 ta tumandagi 4 ming 987 ta maktab ishtirok etadi. Mazkur bosqichda ishtirok etayotgan 112 ta tuman ro‘yxati – bu yerda.

Loyiha kiritish bosqichi «Ochiq byudjet» portalida 31-oktyabrgacha davom etadi. Kiritilgan loyihalar 10-noyabrga qadar saralanib, 11-20-noyabr kunlari ovoz berish bosqichi bo‘lib o‘tadi. Bu mavsumda ishtirok etmayotgan qolgan maktablar dekabr oyida bo‘ladigan 2-mavsumda qatnashadi.

«Mening maktabim» doirasida o‘qituvchilar va maktab ma’muriyati uchun tovar va xizmatlarni xarid qilish taqiqlanadi. Bundan tashqari, quyidagicha loyihalar ilgari surilishiga yo‘l qo‘yilmaydi:

• o‘quvchilar o‘rtasida nizo keltirib chiqaradigan, faqat bir guruh o‘quvchilar foydalanishi uchun mo‘ljallangan loyihalar;
• sanitariya me’yorlarini buzishi yoki tabiatga zarar yetkazishi mumkin bo‘lgan loyihalar (ichimlik suvidan samarasiz foydalanish va boshqalar);
• maktabni saqlash bilan bog‘liq xarajatlar (kommunal xizmatlar va boshqalar);
• o‘quvchilar va o‘qituvchilarning sog‘lig‘i (xavfsizligi)ga ta’sir qilishi mumkin bo‘lgan loyihalar (attraksionlar va boshqalar);
• o‘quvchilar vaqtini behuda o‘tkazishiga olib keladigan, o‘quv jarayoniga salbiy ta’sir ko‘rsatadigan loyihalar (PlayStation kabi o‘yin mashinalari va boshqalar).

Har bir g‘olib maktabga tuman (shahar) byudjetidan BHMning 150 barobari – 61,8 mln so‘mgacha mablag‘ ajratiladi. Kiritiladigan loyihalar qiymati ana shu miqdordan oshmasligi kerak.