Unda partiya Markaziy Kengashi raisining axborot siyosati bo‘yicha o‘rinbosari To‘lqin To‘raxonov yangi Saylovoldi dasturi afzalliklari, olib borilayotgan saylovoldi targ‘ibotlar va uchrashuvlar xususida atroflicha ma’lumot berildi.
Saylovlarga start berilgandan so‘ng O‘zbekiston XDP huzurida markaziy, hududiy, tuman va shahar saylovoldi shtablari faoliyati yo‘lga qo‘yildi. Ularning har biriga saylovoldi kampaniyasining barcha yo‘nalishlarida targ‘ibot-tashviqot, tashkiliy vazifalar yuklatilib, partiya Ijroiya qo‘mitasi tomonidan tasdiqlangan chora-tadbirlar rejasiga muvofiq tadbirlar amalga oshirilmoqda.
Bundan tashqari, saylov shtablari huzurida tun-u kun ishlaydigan fuqarolar qabulxonasi, call-markazlari faoliyati izchil yo‘lga qo‘yildi, ushbu markazlar orqali o‘tgan davrda aholidan mingga yaqin murojaat va takliflar kelib tushgan.
Ayni paytda respublikaning shahar va tumanlari markaziy ko‘chalaridagi LED ekranlarida nomzodlarning 300 ga yaqin targ‘ibot roliklari namoyish etilmoqda. Partiyaning “Har bir inson farovonligi uchun!”, “Ijtimoiy davlat uchun!” shiorlari aks etgan 700 ga yaqin bilbordlarga yirik hajmdagi bannerlar o‘rnatilgan.
Shuningdek, partiya tomonidan tuman-shaharlardagi markaziy va aholi gavjum nuqtalarga 4200 ga yaqin kichik hajmdagi targ‘ibot bannerlari o‘rnatilgan. Maxsus tayyorlangan 260 000 ga yaqin plakatlar ko‘chalar, savdo va xizmat ko‘rsatish majmualari, metro, avtobuslar bekatlari va aholi gavjum bo‘ladigan boshqa joylarga o‘rnatilgan.
Brifingda partiya Markaziy Kengashi raisining axborot siyosati bo‘yicha o‘rinbosari To‘lqin To‘raxonovning ma’lum qilishicha, Surxondaryo viloyati Termiz shahida o‘tgan yirik targ‘ibot tadbirida bir paytning o‘zida 3 ming nafardan ziyod vatandoshimiz ishtirok etgan.
Partiya o‘z saylovoldi dasturida 10 ta yo‘nalish, 15 ta strategik qadamdan iborat qator tashabbuslarni ilgari surmoqda. Keksalar va onkologik kasalliklar kabi og‘ir xastaliklarga duchor bo‘lgan bemorlar uchun sifatli xizmat ko‘rsatishning yuqori standartlarini ta’minlashga qaratilgan xospis tizimini rivojlantirish va “Xospis xizmatini ko‘rsatish to‘g‘risida”gi Qonun loyihasini ishlab chiqish.