Legionerimiz uchrashuvning boshidayoq pozitsiyasini oʻzgartirishga majbur boʻldi. Hujum chizigʻining oʻng qanotidan oʻrin olgan Rifat Jemaletdinov bahsning uchinchi daqiqasidayoq jarohat olib, maydonni erta tark etdi.
Marko Nikolich maydonga Tamerlan Musayevni tushirdi. Bu oʻzgarish natijasida Abbos oʻrnini Musayevga boʻshatib, oʻzi oʻng qanotga oʻtdi.
Biroq 20 yoshli Fayzullayev oʻng qanotda ham yuqori darajada oʻynay olishini koʻrsatib, bellashuvning 19-daqiqasida jarima maydonchasi tashqarisidan aniq va murakkab zarba bilan hisobni ochdi.
Jamoalar tanaffusga chiqishi oldidan Kellven hisobdagi farqni oshirdi.
Tanaffusdan keyin yana katta sahnaga Abbosbek Fayzullayev chiqdi. Bu gal u markaziy hujumchi vazifasini aʼlo darajada uddaladi. Hujum markazida paydo boʻlgan hamyurtimiz qanotdan uzatilgan toʻpni bir harakat bilan “Axmat” darvozasiga joyladi.
Abbosbek Fayzullayev butun uchrashuv davomida faol harakat qildi va jamoadoshlariga bir necha marotaba juda xavfli hujum tashkil qilib berdi, oʻtkin paslar oshirdi. Abbosbekning tezkor, kreativ oʻyini jamoasining gʻalabasiga poydevor boʻldi.
Legionerimiz uchrashuv yakunlanishiga bir necha daqiqa qolganida zaxiraga olinib, oʻrnini malilik hujumchi Seku Koytaga boʻshatib berdi.
Shu bilan Abbosbek Fayzullayev yangi mavsumdagi gollari hisobini ochib oldi va SSKA safidagi ilk dublini qayd etdi.
SSKA esa yirik hisobdagi gʻalabadan keyin ochkolar sonini 17 taga yetkazib oldi va musobaqa jadvalida hozircha 4-oʻrinni egallab turibdi.
.png&w=3840&q=75)
