O‘zbekistonda intellektual mulk muhofazasi bo‘yicha yangi portal ishga tushiriladi

“Intellektual faoliyat natijalarini rag‘batlantirish hamda sohaga zamonaviy axborot-kommunikatsiya texnologiyalarini joriy etishni kengaytirishga oid qo‘shimcha chora-tadbirlar to‘g‘risida”gi prezident qarorida belgilanishicha, ushbu portalda:

• intellektual mulk masalalariga oid murojaatlar qabul qilinadi;
• intellektual mulk obyektlari bilan bog‘liq shartnomalarni onlayn tuziladi;
• Intellektual mulk masalalariga oid uslubiy tavsiyalar joylashtiriladi hamda fuqarolar va tadbirkorlik subyektlarining savollariga real vaqt rejimida (onlayn) javob beriladi;
• kontrafakt tovarlar hamda intellektual mulk huquqlarini buzganligi uchun faoliyati cheklangan veb-saytlar to‘g‘risidagi ma’lumotlar joylashtiriladi.

Hujjatga ko‘ra, 2026-yil 1-martdan tadbirkorlarning barqarorlik reytingini aniqlashda intellektual mulkka oid huquqbuzarliklar uchun sud tomonidan javobgarlik choralari qo‘llangani reyting ballarini kamaytiruvchi hamda tovar belgilari, xizmat ko‘rsatish belgilariga ega bo‘lish qo‘shimcha ball beruvchi ko‘rsatkich hisoblanadi.

2026-yildan har yili “Eng yaxshi ixtiro”, “Eng yaxshi foydali model”, “Eng yaxshi sanoat namunasi”, “Eng yaxshi EHM uchun dastur va ma’lumotlar bazasi” hamda “Eng yaxshi seleksiya yutug‘i” nominatsiyalari bo‘yicha respublika tanlovi o‘tkazib boriladi. Tanlovning har bir nominatsiyasi bo‘yicha 1, 2 va 3-o‘rin g‘oliblariga BHMning 150 (61,8 mln so‘m), 125 (51,5 mln so‘m) va 100 baravari (41,2 mln so‘m) miqdorida mukofot puli beriladi.

Intellektual mulk obyektlarini boshqarish bo‘yicha quyidagilarda oliy ma’lumotli kadrlar tayyorlashni yo‘lga qo‘yiladi:

• 2026/2027 o‘quv yilidan – O‘zbekiston milliy universitetida;
• 2029/2030 o‘quv yiligacha kamida 4 ta oliy ta’lim muassasasida.

“Intellektual mulk sohasini rivojlantirishga qo‘shgan hissasi uchun” ko‘krak nishonini ta’sis etiladi.